بیست ءُ یک دسمبر ءَ ایریس روچ ءِ مدار ءِ میان ءَ گوزیت، ناسا

دو ھزار ءُ دوازدہ ءِ سال ءَ دُنیا ءِ دگہ انساناں ابئید سائنسدان ھم بیم آماچ کُتگ اَنت۔ امریکی آزمانی پٹ ءُ پولی گارگس ناسا (NASA) ءِ ردا روچ وتی مدار ءَ یازدہ سال ءَ یک سفرے سرجم کنت۔ ناسا ءِ ردا ۲١ تاں ۲۳ دسمبر ءَ ایریس ﴿ERIS﴾ نامیں سیارہ ئے روچ ءِ مدار ءِ نیام ءَ گوزیت۔ ناسا ءِ ردا ایریس ءِ کشش ءِ سوب ءَ روچ وتی راہ ءَ تاب کنت ءُ جھل کپیت۔ ایشی ءِ سوب ءَ زمین شمسی برانزانی آماچ بیت ءُ مزنیں تباھی ءَ گوں دُچار بیت۔ ناسا ءِ نیمگ ءَ اے پٹ ءُ پول ھم دیم ءَ اتکگ کہ ایریس روچ ءِ مدار ءِ میان ءَ سئے ھزار ءُ شش سد سال ءَ پد یک رندی کئیت۔

ایریس ءِ روچ ءِ مدار ءِ میان ءَ گوزگ ءَ چے مزنیں تباھی ءِ گُمان زاھر کنگ بیئگ اِنت۔ اے گپ ھم دیما اَتکگ کہ چر ایشی ءَ چہ زر ءَ کیمیائی بدلی سدلیانی سوب ءَ آس لگیت ءُ زر زمین ءَ پلکیت۔  دومی نیمگ ءَ ناسا ءِ گُشگ ءِ پدا ایریس سئے ھزار ءُ شش سد سالاں پد وتی سفر ءَ سرجم کنت ءُ روچ ءِ مدار ءِ میان ءَ گوزیت، بلے انسانی تاریخ ءَ ھچ چوشیں قیامت گونگیں تباھی ءِ نشانی نیست اَنت کہ ایریس ءِ سوب ءَ پیش اَتکگ

گوادر: پاکستانی سروزیر آیگ ءَ ، بازار بند شھرویران ، دریا وردانی سر ءَ بندش

 اَکس اچ آئی لال بلوچ : گوادر ءَ زورگریں ملک پاکستان ءِ مزن وزیر ءِ آھگ ءِ وھد ءَ ھڑتال اِنت دگ  ویران ، میدانی یدار ننگر ءُ سپاھیگ دگانی سر ءَ پانگ اَنت۔ 

 گوادر : [ ھال : اَچ آئی لال بلوچ ] : گوادر ءَ زورگریں ملک پاکستان ءِ سروزیر آیگ ءِ سر ءَ زھرشانی کنان ءَ مردماں  بازار بند ءُ دگ یلو داتگ اَنت ۔ مزنیں کساسے ءَ ایف سی ءُ پولیس ءِ کارمند دگانی سر ءَ اُوشتاتگ اَنت ءُ آسمان ءَ ھیلی کاپٹر ترگ ءَ اَنت ۔

مروچی زورگریں ملک پاکستان ءِ سروزیر راجا پرویز اشرف ماں بلوچستان ءِ  کاسگ چٹیں سرکار ءِ زمستانی بنجل گوادر ءَ بیوکیں اُگدہ دارانی دیوان ءَ بھر زورگ ءَ اَتکگ ۔ 

زورگریں ملک پاکستان ءِ سر وزیر ءِ آیگ ءِ سر ءَ سرجمیں مکوران ءِ مردماں زھرشانی دْرشانتگ ءُ بلوچ نیشنل موومنٹ ءِ جار ءِ پد ءَ گوادر ءِ پجیگ ءَ سرجمیں مکوران ءَ دربندیں ھڑتال کرتگ ۔

چَہ گوادر ءَ مئے اھوالکار ءَ ھال دیان ءَ گْوشتگ کہ زورگریں ملک ءِ سر وزیر ءِ آیگ ءِ سبب ءَ چَہ دوشگیں شپ ءَ پاکستانی پولیس ءُ ایف سی ءِ سپاھیگاں وتی گشت ءُ گر ءُ دارءِ تہ ءَ گیشی آورتگ ۔ چَہ سھب ءَ پاکستانی لشکریانی کساس گیشتر بوتگ ءُ پدی زَر دگ پہ مھلوک ءِ رو ءُ آ ءَ سرجمے ءَ بند اِنت ۔

 زورگریں سرکار ءَ میدانی سر ءَ ھم داں دہ نومبر ءَ دریا ءَ روگ ءِ بندش جتگ چَہ اے بندش ءِ سبب ءَ ایرانی سیمسراں بیوکیں   ڈیزل ءِ شپکی [ اسمنگلنگ ] ھم بند اِنت۔

گوادر ءَ پاکستانی سروزیر ءِ آیگ ءَ شھر یک جنگ گیپتگیں شھرے ءِ ندارگ ءَ پیش دارگ ءَ اِنت ، آزمان ءَ رنگ رنگیں ھیلی کاپٹر تروکی ورگ ءَ اَنت ، زمین ءِ سر ءَ رنگ رنگیں گد ءَ گوں پاکستانی لشکری دْرک ءُ دور اَنت ، شھر ءِ درآیگ ءُ پترگ ءِ راہ گوں مھکمی بندگ بوتگ اَنت ءُ آیوک درآیوک پٹگ بوگ ءَ اَنت۔ ابید چَہ سرکاری کاسگ چٹاں کس زورگریں ملک ءِ سروزیر ءِ نزیک ءَ روگ ءَ نہ اِنت ۔ بلوچ چَہ اے دراھیں سرگرمیاں وت ھم دور اَنت ءُ زورگریں سرکار ھم آھاں وتی نزیک ءَ آیگ ءَ دارگ ءَ اِنت ۔

گوادر: پاکستانی مزن وزیر گوادر ءَ کئیت ، مکوران ءَ دربندی بیت ' بی این ایم

گوادر : باندءَ بزاں نو نومبر ءَ زورگریں ملک پاکستان ءِ سر وزیر راجہ پرویز اشرف ءِ ماں گوادر ءَ آیگ ءِ زھر ءَ   سرجمیں مکوران ءَ چَہ بی این ایم ءِ نیمگ ءَ دربندی ءِ جار
جنگ بوتگ ۔

بی ایس او آزاد ، بی آرپی ءَ اے دربندی ءِ پلہ مرزی کرتگ ۔  

زانگ بہ بیت گوادر ءَ زورگریں ملک پاکستان ءِ سروزیر ءُ مزنیں اُگدہ دارانی تر ءُ تاب ءِ وھد ءَ مدام چَہ راجدوستانی نیمگ ءَ دربندی ءُ زھرشانی کنگ بیت۔

امریکا ، صدرارتی گچینکاری، بارک اوباما دوبر صدر نامینگ بوتگ۔

بام؛ رسانکی ھالانی ردا امریکی صدارتی گچینکاریاں ڈیمو کریٹک پارٹی ءِ  بارک اوباما یک رندی پدا امریکی مھلوک ءَ صدارتی اگدہ ءِ ھاترا گچین کُتگ۔ بارک اوباما ءِ سوبمندی ءِ مستریں سوب القاعدہ سروک اسامہ بن لادن کوش زانگ بیت۔ بارک اوباما امریکی مھلوک ءَ تران کنان ءَ گُشتگ کہ امریکا ءِ سلامتی ءِ رکینگ ءِ ھاترا مارا تنیگہ باز جھد کنگ کپیت، دنیگہ مئے مشن سرجم نہ اَنت۔
بارک اوباما ءَ سئے صد سئے الیکٹورل ووٹ کَٹ اِتگ  ءُ یک رندی پدا امریکا ءِ صدر نامینگ بوتگ۔ آئی ءِ مقابلہ ءَ ری پبلکن ءِ امیدوار مٹ رومنی ءَ دوصد ءُ شش الیکٹرول ووٹ کٹ اتگ، وھدیکہ ریاست فلوریڈا ءَ آسر دیما نیاتکگ اَنت۔

گوادر : جنید ء اللہ بخش پاکستانی لشکریاں چَہ ھتل ءَ آوار جتگ

  گوادر :   گوادر ءِ نندوکیں جنید پاکستانی لشکریاں آوار جنگ ءَ پد بیگواہ کرتگ ۔ مارا رستگیں ھالانی رِد ءَ آ  آدینگ ءِ روچ 12 اکتوبر 2012 ءِ ادار یک ءُ نیم ءَ چَہ ھتل زیروپوائنٹ ءَ پاکستانی لشکریاں جاوید ٹرانسپورٹ
ءِ مساپریں کوچ ءَ ایر کاپینتگ ءُ گوں وت وتی بنجلاں برتگ ۔

جنید ءِ کماش ءِ نام اللہ بخش ءُ گوادر ءِ نندوک اِنت ۔ آئی ءِ کھول ءِ مردماں گمان دْرشانتگ کہ جنید پاکستانی چیریں ادارھاں آوار جتگ ءُ اے بلوچستان ءَ بلوچانی سر ءَ بیوک زور ءُ کھرانی دْرچ اِنت کہ چَہ زور گریں سرکار ءِ
نیمگ ءَ برجاہ اِنت ۔

آئی ءِ کھول ءَ گْوشتگ کہ جنید ءِ دزانی رنگ ءَ آوار جنگ پاکستانی سرکار ءُ آئی ءِراھبندی ادارھانی نیمگ ءَ انسانی حقانی لگتمالی اِنت ، باید جنید زوت عدالت ءَ پیش کنگ بیت ۔

آھاں اے ھم گمان دْرشان کرتگ کہ اگاں انسانی حقانی پانکجنیں دمگ ءُ میان اُستمانی گلانی نیمگ ءَ پاکستانی سرکار ءِ سر ءَ زور دیگ مہ بیت ترس اِنت کہ جنید ھم آ دگہ بلوچانی رنگ ءَ کشگ ءُ چگل دیگ بہ بیت ۔

بلوچستان ءَ چَہ پاکستانی رستریں لشکریانی نیمگ ءَ بلوچ ورناھانی آوار جنگ ، کشگ ءُ چگل دیگ یک نوکیں ھبرے نہ اِنت ، بلوچستان ءَ بیوکیں جنگ ءِ تہ ءَ ھروھدے کہ گیشی ءُ تْرند کئیت پاکستانی لشکری بلوچ بے سلاھیں ورناھاں چست کنگ ءُ کشگ ءِ تہ ءَ تیزی کار اَنت ۔

صدیق صلاح ءِ وانگی ''گیمُرتگیں پُلانی پُرشتگیں گُلدان'' شنگ بوتگ

بام؛ بلوچ شاعر واجہ صدیق صلاح ءِ شعرانی دومی دپتر''گیمُرتگیں پُلانی پُرشتگیں گُلدان''  چہ بلوچستان اکیڈمی کیچ ءِ نیمگ ءَ چاپ ءُ شنگ بوتگ۔ 

شھید قدیر بلوچ ﴿بالاچ جان﴾

بام ھال کارٹون : الیکشن دو ھزار سینزدہ ' اَچ غفار بلوچ

سوراب ءَ پاکی لشکر ءُ شفیق مینگل گروپ ءِ اُرشاں سئے بلوچ شھید بوتگ

بام: سوراب ءِ ھَند گدر ءَ پاکی لشکر ءِ اُرش سیمی روچ ءَ جاری بیتگ۔ بلوچ چُک چینی ءِ اے ارشاں آئی۔ایس۔آئی ءِ داشتگیں کاسگ چَٹ شفیق مینگل ءُ عالم خان زھری ءُ ثناءاللہ زھری ھم ھوار اَنت۔

بلوچ نیشنل فرنٹ ءِ ردا چرے ارشاں سئے بلوچ شھید بوتگ اَنت کہ ایشانی تھا یک زھگے ءُ دو زالبول ھوار اَنت۔

ابئید ء چیریں ادارھانی رضا ءَ کَس پاکستان ءَ شُت نہ کَنت۔ خان آف کلات

بام: بلوچ رھشون خان آف کلات واجہ سلیمان داؤد ءَ ھندی بلوچی چینل ءَ تران کنان ءَ گُشتگ کہ ھستیں وھد ءَ کہ ھزاراں بلوچ ورناہ گار ءُ بیگواہ اَنت ، کَس ابئید ء چیریں ادارھانی کمک ءَ پاکستان ءَ شُت نہ کَنت۔ آئی ءَ گُشتگ پاکی آمیدگس ءَ ھچ وڑیں بستار نیست، اے ھما آمیدگس اِنت کہ ایشی ءَ این۔آر۔او ءِ تحت ءَ فوجی جنرل مشرف ءَ سوگند دات۔

خان آف کلات ءَ گُشتگ واجہ عطا ٰاللہ مینگل ءَ پیش ءَ وت گُشتگ کہ پنجابی مئے مستریں برات اَنت، اختر مینگل ءِ ماں پاکستان ءَ رؤگ ھمے گپ ءِ درچ ءَ کئیت۔ آئی ءَ گُشتگ من کسی سرا بھتام نہ جناں، بلے اے وھد ءَ ھزاراں بلوچ ورناہ آوار جنگ ءُ بیگواہ کنگ بوتگ اَنت۔ بلوچ ورناھانی ٹپ ءُ ٹوریں لاش ماں دگ ءُ ویراناں چگل دیگ بیئگ ءَ اَنت۔ بلوچ مات ءُ گُھارانی شرپ لگتمال بیئگ اِنت۔ اے نوبتاں پاکستان ءِ رؤگ وت یک جُستے۔

آئی ءَ گُشتگ کہ مرچی بلوچ جیڑہ میان استمانی تکاں سر بوتگ ءُ ھرعالمی ادارہ بلوچ ءِ پلہ مرزی ءَ کنگ اِنت۔ آمیدگس ءِ ڈاہ ءُ شور ماں میان استمانی تکاں بلوچ راجی جُھد ءِ ایرموش کنگ ءِ پندلے۔ پاکی وتگڑیں آمیدگس ءِ سرا بھیسہ دارگ ماں میان استمانی تکاں بلوچ ءِ توار ءِ ایرموش کنگ ءِ درچ ءَ کئیت۔ 

پاکستانی ادارھانی سرا بھیسہ پاکستان ءِ رکینگ ءِ پندلے۔ ڈاکٹر منان بلوچ

  بام: بی۔این۔ایم ءِ ڈاکٹر منان بلوچ ءَ گُشتگ اختر مینگل ءِ دوبر  پاکستان ءَ آیگ ءُ ماں آمیدگس ءَ پیش بیئگ پہ بلوچ راجی جُنز ءَ جوانیں گامگیجی نہ اِنت۔ پاکستان ءِ کجام وڑیں ادارہ ءِ سرا بھیسہ دارگ جِند ءِ ریپینگ اِنت۔ آئی ءَ گُشتگ ماں پاکی آمیدگس ءَ گار ءُ بیگواھیں مردمانی ”کیس“ ءِ گوشدارگ ءِ دؤران ءَ ھم بلوچ ورناہ گار ءُ بیگواہ کنگ ءُ آھانی لاش دز کپتگ اَنت۔ اے ردا ھچ فوجی جنرل ءَ سزا نہ رَستگ۔

آئی ءَ گُشتگ اے کرد پہ پاکستان ءِ رَکینگ ءِ ھاترا کَنگ بیئگ ءَ اَنت۔ چیاکہ یو۔این۔او ءِ ورکنگ گروپ ءِ ماں بلوچستان ءَ آیگ ءِ سرا چیف جسٹس ءَ اے گپ وت من اِتگ کہ اے پہ پاکستان ءَ نیکیں پالے نہ اِنت۔

ڈاکٹر منان ءَ گُشتگ مارا پاکستان ءِ ھچ ادارہ ءِ سرا بھیسہ نیست۔ مئے بھیسہ گوں عالمی ادارھاں بندوک اِنت کہ آ اے ردا گامگیج بہ زوراَنت۔ او مرچی بلوچ ورناھانی قربانیانی بدولت ءَ بلوچ جیڑہ ماں میان استمانی تکاں سَر بوتگ۔

شیخ مجیب الرحمان ءَ پَد ، اختر مینگل ءِ شش پوائنٹ

بام: بی۔این۔پی مینگل ءِ سروک اختر مینگل ءَ ماں پاکستانی آمیدگس ءَ وتی شش پوائنٹاں پیش کنگ ءَ پَد ماں رسانکدر ءَ تران کنان 

ءَ گُشتگ منی ششیں پوائنٹ چہ بنگالی راجدوست شیخ مجیب رحمان ءِ ششیں پوائنٹاں ھچ وڑا جتا ءُ گِستا نیاں۔

شیخ مجیب الرحمان ءِ شش پوائنٹ۔۔۔۔۔۔۔۔

اولی: قرارداد لاھور ءِ ردا نوکیں آئین ٹھینگ بہ بیت۔ دومی وفاق ءِ گورا بَس  دفاع ءُ دری کارانی ”محکمہ“ بہ بنت۔ آ  دگہ سرجمیں اگدہ وفاقی استان یا یونٹاں دیگ بہ بنت۔ سیمی جتائیں مالی پالیسی ٹھینگ بہ بنت ءُ مشرقی پاکستان ءِ کرنسی وتی بہ بیت۔ چارمی ٹیکس ءُ آمدن یکجاہ کنگ ءِ اگدہ وفاق ءِ دست ءَ مہ بیت ءُ اے ردا یونٹ آجو بہ بنت۔ پنچمی مشرقی ءُ مغربی پاکستان ءِ بیپاری ھساب ءُ کتاب جُتا جُتا بہ بنت، اے ردا وفاق ءِ دزمانجنی مہ بیت۔ ششمی مشرقی پاکستان وتی جتائیں پیراملٹری ءِ ٹھینگ ءَ آجو بہ بیت۔

اختر مینگل ءِ ششیں نکات

اولی ماں بلوچستان ءَ فوجی آپریشن بند کنگ بہ بیت۔ دومی سرجمیں بیگواھیں مردم وئیل کنگ بہ بنت۔ سیمی ماں بلوچستان ءَ رَستگیں ٹپ ءُ ٹوریں لاشانی ذمہ وار سزا دیگ بہ بنت۔ چارمی نواب اکبر خان ءُ دگہ بلوچانی قاتل دزگیر کنگ بہ بنت۔پنچمی فوجی آپریشن ءِ آسرا دگہ ھند ءُ دمگاں رپتگیں مردم دوبر آرگ ءُ آھانی گِس ءُ دگہ آسراتیانی انتظام کنگ بہ بیت۔ ششمی ماں بلوچستان ءَ سیاسی گلاں گوں آزاتی ءَ کار کنگ ءِ موہ دیگ بہ بیت۔